Одењето во автоперална може да биде прилично скапо. Како што покажува извештајот на Германското автомобилско здружение за 2019-та година, околу 40 отсто од возачите ги перат своите автомобили еднаш месечно, а речиси три четвртини од нив тоа го прават во перална за автомобили за просечно 11 евра по перење, или 130 евра годишно.
Доколку сакате да заштедите и да го перете автомобилот сами во својот двор или паркинг, може да се соочите со високи казни во некои исклучителни случаи, пишува Fenix Magazine.
Ако се решите сами да го исперете вашиот автомобил тоа може да биде забрането и, во зависност од покраината, може да платите казна до 100.000 евра. Причината за ова е т.н. Закон за водни ресурси (WHG), кој забранува употреба на токсични материи или супстанции кои ја загадуваат водата која потоа оди во подземните води (член 48 WHG).
Затоа, при перење на автомобил на приватен имот, мора да се исклучи можноста нечистата вода да навлезе во земјата. Поради оваа причина, обично е забрането перење автомобили со хемиски средства за чистење во вашата градина или двор.
Постои ризик од високи казни
Бидејќи законодавството не предвидува единствени регулативи, спроведувањето на барањата за WHG е оставено на самите општини. Затоа, додека во некои заедници перењето автомобили само со вода е дозволено, во други заедници може да биде забрането поради можноста за загадување на водата со остатоци од масло.
Во зависност од покраината, прекршувањето на Законот за водни ресурси може да доведе до високи казни. На пример, казната за загадување на подземните води со големи количини на други течности кои ја загадуваат водата во Саксонија е до 100.000 евра.
Ако планирате да го исперете автомобилот, дефинитивно треба претходно да проверите во комуналните претпријатија во општина или да го однесете автомобилот на чистење во автоперална.
